Il-kampanja ta’ għarfien soċjali ta’ Youth Cancer Europe għandha l-għan li tneħħi l-istigmi assoċjati ma’ dijanjosi tal-kanċer fost iż-żgħażagħ. Il-kampanja tħabbret bir-rilaxx ta’ vidjo bl-isem #removelabels, li fih grupp ta’ żgħażagħ li għelbu l-kanċer iżommu kartelli bil-karrieri tagħhom imħassra u bit-“tikketti tal-kanċer” rispettivi tagħhom jieħdu l-post ewlieni qabel ma dawn jitneħħew biex jisfidaw il-perċezzjoni li l-kanċer jiddefinixxi min huma.
Šarūnas Narbutas, ko-Fundatur u Chairman ta’ Youth Cancer Europe, qal: “Il-kampanja tagħna #removelabels twassal messaġġ ta’ għarfien soċjali. Filwaqt li nkomplu niġġieldu fuq livell istituzzjonali għal kwalità tal-ħajja aħjar għal pazjenti żgħażagħ u għal dawk li għelbu l-kanċer, irridu niftakru li l-kelma “kanċer” għadha ġġorr magħha ħafna stigma, speċjalment madwar iż-żgħażagħ. Huwa għalhekk li huwa importanti li nfakkru lis-soċjetà b’mod ġenerali li ż-żgħażagħ li għelbu l-kanċer sempliċement iridu jerġgħu jibdew jgħixu ħajja normali wara l-kanċer. Il-futur tagħhom ifisser għalihom ħafna aktar minn dijanjosi tal-kanċer, u proprju hekk iridu li jarahom kulħadd.”
“Dawk li għelbu l-kanċer ma jridux jidentifikaw ruħhom mat-tikketti li s-soċjetà tagħtihom”, tgħid Katie Rizvi, CEO u ko-fundatriċi ta’ Youth Cancer Europe. “Bħal kull adult żagħżugħ ieħor, huma nies bil-ħolm u bl-ambizzjonijiet tagħhom u b’ħajja sħiħa quddiemhom. Li dan jiġi mxekkel permezz ta’ stigmi, minbarra l-limitazzjonijiet eżistenti fi ħdan l-istituzzjonijiet pubbliċi u privati, ifisser effettivament li tisirqilhom futur aħjar. Ma jridux ikollhom iżommu l-passat tagħhom bil-kanċer sigriet meta japplikaw għal xogħol jew meta jiltaqgħu ma’ xi ħadd ġdid minħabba l-biża’ tal-esklużjoni; minflok iridu jieqfu jitqiesu bħala pazjenti, u jiġu rikonoxxuti bħala professjonisti għall-kwalitajiet li jagħmluhom min huma bħala individwi.”
