Sar progress sinifikanti fir-riżultati tat-trattament tal-kanċer fit-tfal. Il-progress kien u huwa possibbli minħabba kollaborazzjoni mill-qrib fost il-professjonisti tal-onkoloġija pedjatrika mhux biss f'pajjiż wieħed, iżda fiċ-ċentri kollha jew fil-biċċa l-kbira tagħhom f'ħafna pajjiżi.
Waħda mill-kundizzjonijiet biex jinkisbu riżultati komparabbli u riżultati komuni hija li kull wieħed miċ-ċentri li jipparteċipaw fi provi kliniċi għandu jissodisfa ċerti rekwiżiti kemm f’termini ta’ infrastruttura għad-dijanjostika medika kif ukoll prattiċi ta’ xogħol komuni mwettqa minn professjonisti tas-saħħa. Waqt l-iżvilupp tar-riżultati li twettqu minn provi kliniċi multiċentriċi u multinazzjonali, kultant ġew innutati differenzi sinifikanti fl-effetti terapewtiċi.
Ġiet identifikata problema oħra – il-kundizzjonijiet finanzjarji tal-istituzzjonijiet ta’ trattament li fihom joperaw l-unitajiet tal-onkoloġija pedjatrika. Il-maniġers tas-saħħa jfittxu soluzzjonijiet biex inaqqsu l-ispejjeż u l-unitajiet tal-onkoloġija pedjatrika ħafna drabi jiġu ttrattati bl-istess mod bħal unitajiet pedjatriċi oħra. L-istandards meħtieġa f'dawn l-unitajiet ma jiggarantixxux il-funzjonament tajjeb tal-unitajiet tal-onkoloġija pedjatrika, peress li pazjenti żgħażagħ rikoverati għall-kanċer jiddependu fuq u jeħtieġu kura intensiva u superviżjoni kostanti.
Għalhekk, ġie identifikat il-kunċett ta' standards komuni għal unitajiet ta' onkoloġija pedjatrika. B’kunsiderazzjoni ta’ dan kollu, f’Mejju 2008 il-Bord tas-SIOP Europe, is-Soċjetà Ewropea għall-Onkoloġija Pedjatrika, iddeċieda li jħejji rapport dwar l-istat attwali u l-istandards taċ-ċentri tal-onkoloġija pedjatrika fl-Ewropa.
Għal dan il-għan, tħejja kwestjonarju u mibgħut lir-rappreżentanti tal-onkoloġisti tat-tfal fil-pajjiżi Ewropej kollha. Fuq il-bażi tar-riżultati miksuba mill-istħarriġ, il-Bord tas-SIOPE qies li l-organizzazzjoni ta’ konferenza kienet il-‘pass li jmiss’ vitali fit-tħejjija ta’ abbozz ta’ dokument, intitolat, “Standards Ewropej ta’ Kura għat-Tfal bil-Kanċer”.
